सावधान! लातूर पोलिसांचा ‘थर्ड आय’; स्वतःचा मृत्यू भासवून १ कोटी लाटण्याचा थरारक कट उधळला!
विमा हडपण्यासाठी निष्पापाचा बळी देणारा क्रूरकर्मा २४ तासांत जेरबंद
खाकीच्या ‘अॅक्शन’ने लातूर हादरले!
लातूर l प्रतिनिधी
कर्जाचा डोंगर आणि विम्याचे १ कोटी रुपये मिळवण्याच्या हव्यासापोटी एका तरुणाने स्वतःचा मृत्यू भासवण्यासाठी दुसऱ्या एका व्यक्तीची निर्घृण हत्या केली.
मात्र, लातूर पोलिसांच्या सतर्कतेने आणि तांत्रिक कौशल्याने अवघ्या २४ तासांत या भयानक कटाचा पर्दाफाश केला आहे. गणेश गोपीनाथ चव्हाण असे अटक करण्यात आलेल्या आरोपीचे नाव असून, पोलिसांनी त्याला सिंधुदुर्ग जिल्ह्यातील विजयदुर्ग येथून ताब्यात घेतले आहे.
नेमकी घटना काय?
दिनांक १३ डिसेंबरच्या रात्री उशिरा औसा-वानवडा रोडवर एक स्कोडा गाडी जळत असल्याची माहिती पोलिसांना मिळाली. गाडीत एक मानवी सांगाडा पूर्णपणे जळालेल्या अवस्थेत आढळला.
घटनास्थळावरील परिस्थितीवरून तो मृत्यू आरोपी गणेश चव्हाण याचाच असावा, असे भासवण्यात आले होते. नातेवाईकांनीही तशी ओळख पटवली होती.
असा उघड झाला बनाव:
पोलिसांना सुरुवातीपासूनच या घटनेबाबत संशय होता. स्थानिक गुन्हे शाखा आणि औसा पोलिसांनी तांत्रिक तपास केला असता, ‘मृत’ घोषित झालेला गणेश चव्हाण जिवंत असल्याचे धागेदोरे मिळाले. पोलिसांनी तात्काळ हालचाली करत त्याचा पाठलाग केला आणि त्याला विजयदुर्ग येथून बेड्या ठोकल्या.
भयंकर कबुली: एका निर्दोषाचा बळी!
पोलिसी खाक्या दाखवताच आरोपीने गुन्ह्याची कबुली दिली. आरोपीवर ५७ लाख रुपयांचे कर्ज होते. त्याने स्वतःच्या नावे १ कोटीचा विमा काढला होता. हे कर्ज फेडण्यासाठी त्याने स्वतःच्या मृत्यूचा बनाव रचला. यासाठी त्याने गोविंद किशन यादव (वय ५०) या लिफ्ट मागणाऱ्या निष्पाप व्यक्तीला गाडीत बसवले, त्यांना दारू पाजून आणि जेवण देऊन बेशुद्ध केले. त्यानंतर त्यांना चालत्या गाडीत सीटबेल्ट लावून बांधले आणि गाडीसह जिवंत जाळून मारले.
पोलिसांची मोठी कारवाई:
पोलीस अधीक्षक श्री. अमोल तांबे, अपर पोलीस अधीक्षक आणि त्यांच्या पथकाने अत्यंत चाणाक्षपणे या गुन्ह्याचा छडा लावला. गुन्हेगाराने कितीही हुशारीने कट रचला तरी तो कायद्याच्या तावडीतून सुटू शकत नाही, हे या कारवाईने पुन्हा एकदा सिद्ध झाले आहे.
गुन्हेगारांसाठी इशारा:
”गुन्हा करून कायद्यापासून वाचता येईल हा भ्रम आता सोडून द्या. लातूर पोलिसांची नजर प्रत्येक हालचालीवर आहे. तुम्ही कितीही लांब पळालात तरी खाकीचे हात तुमच्यापर्यंत नक्कीच पोहोचतील!”
#LaturPolice #CrimeNews #PoliceAction #AlertLatur #CrimeExposed #LawAndOrder #MurderMysterySolved #MaharashtraPolice #CriminalInvestigation #SinghamStyle
